2017年8月17日 星期四

寶寶成長里程碑 **18個月


Day 571 *1y6m23d

不知不覺,加盟《小高廚房》已有一段日子的未來小廚神 - 林小魚已經18個月大,愈來愈多嘢講,愈來愈多意想不到的想法同古惑嘢XD。


































媽mi成日都想記錄小如的成長路,但我太懶了......

唔得唔得,小高不許懶要快快記下來,囡囡實在大得太快了。
















































剛過去的星期三是小高生日,意味著又老一歲了!haha...


鬼馬魚爸教小如同我講 Happy Birthday,還奉上禮物,感動得不知怎形容,一句「Happy Birthday、送比你」教媽mi窩心不已。































小如村妹大鄉里出城,上周三跟爸媽出發遊澳門兩日一夜為我慶生。


謝謝爸bi和友人的悉心安排,讓我有個難忘又開心的生日之旅。這次入住澳門悅榕莊賣點是每間套房配備室內私人泳池,終於可為小如來個 Summer 下水禮。

阿囡成日喊著要洗手,係用泳池啲水洗......XD。






























好多朋友或媽媽們會問,你係點樣教小如講咁多嘢?

想回來,小如的確好早就開始講嘢,未夠11個月已學會講「謝謝」,依家仲講埋句子(仲愈來愈長),真心覺得 Amazing。

令我感意外是小如記性真好,早兩天跟老友約會食飯,自發性不用提點遂一叫喊她們的名字,就連新相識只介紹一次的姨姨叔叔都記得,好厲害呀!逗得所有人都好歡喜,開懷大笑。































兩個多月前,即小如16個月時開始講句子,我要媽媽 / 爸爸抱、我愛你媽媽、我要媽媽奶、媽媽開、謝謝媽咪、如如自已細細個(我手機wallpaper係佢,所以一見到就講...)。

哥哥姐姐姨姨叔叔、我要食糕糕 / 包包、爸爸返工、攬攬爸爸、嗲嗲媽媽、媽咪煮飯炒炒炒、黑蚊蚊要瞓覺、有蚊蚊咬如如、手手"胡joe"、到左落車啦、去街街拖實媽咪、有貓貓、有汪汪(狗)、電單車好快要小心、去吉之島買餸、買菇菇炒炒炒、媽咪開歌歌、聽ABC歌歌、落雨雨要"擔"傘戴帽帽 .....































1歲零兩個月前無比小如看過電視、手機或是其他的電子產品,直到兩三個月前才遂步放寬,由久不久的一次半次,到現在一星期大約有三、四次電視時間,看YouTube唱兒歌,有時會讓她看毛毛(怪獸公司)。

講起怪獸公司呢套電影,小如真係好鐘意睇,幾乎每天都提起毛毛,還跟我講故事「毛毛好朋友係阿Boo、仲有大眼仔米高(好鐘意聽小如講呢個五個字好得意)、變色龍曳曳豬、嚇阿Boo......變色喺門度」。好可愛 ^^ ~ 


最近又一新竉「巴斯光年」XD!

































有時會自己唱吓歌仔、跳舞,愛唱⋯⋯ 

row row row your boat ~ 

head and shoulder knees and toes ~ 

rain rain go away ~ 

If you're happy and you know it, clap your hands (心情好時手舞足蹈)

時間又到差唔多,叮叮叮叮叮(加句"小朋友收玩具啦" 學校教)

小朋友 bye bye,小朋友 bye bye ~ 































14個月大的小如行吓跌吓,要拖住大人先行得穩,15個月後愈行愈好,進步神速,叻囡!依家走得好快,幸好小如是個好寶寶,出街會拖實爸爸媽媽,或叫我吔抱(但有時愈叫愈走=.=)。
































無論喺認人定認物件都出乎意料之外......

人物篇:爸爸媽媽、爺爺嫲嫲、公公婆婆、哥哥姐姐、弟弟妹妹、姨姨叔叔、大伯二伯、大伯娘、二伯娘、Auntie、朋友仔和老師的名字。

動物篇:牛牛(仲會有聲音演繹)、雀仔、虎虎、熊熊、兔、貓貓、狗狗、龜龜、魚魚、北極熊、蝙蝠、袋鼠、duckduck、crocodile、zebra、lion、monkey、bear ......

數字篇:能夠由1數到10(中及英)......
































食物篇:菇菇、菜菜、飯飯、餅餅、粉粉、紅蘿蔔、蕃茄、魚魚、果果、瓜瓜、秋葵、媽媽奶、汁汁、橙、橙汁、香蕉、士多啤梨(唔太正)、桃、藍苺、蛋糕、包包、湯、粟米水、水水、芝士 ......

物件篇:書書、車車、匙、筆筆、片片、巾巾、potty、電視、玩具、煮飯仔、風扇、櫈、雪櫃、櫃、電話、電腦、umbrella......

環境篇:能分辨哪兒是客廳、廚房、廁所、睇房、公公婆婆屋企、爺爺嫲嫲屋企、學校......



仲會講早晨、good morning、午安、good evening、謝謝、thank you、see you、rainbow、teacher、seat belt、ranining、Happy Birthday to you、匙匙、义义、碗碗,口水肩、抹手手、筷子、媽媽爸爸食飯、打電話比婆婆、唔駛客氣(暫時只講到客氣兩字)、大部份的迪士尼的朋友、姑娘、傷口(之前病左同佢講有姑娘上門同媽咪洗傷口,佢就記住左)......






























懂得叫喊自己中文和英文的名字,知道自己一歲半!

當爸爸將車子駛入停車場泊車時,提她安靜會 "薯" 仲會做埋手勢,真係好搞笑!






























食嘢方便,早晚兩餐媽媽奶,3-4餐固體,暫時仲未比小如食大人嘢。

有時係會覺得辛苦,尤其趕出街一定要準備好阿囡三餐食咩先顧自己,我就咁諗......人生漫漫長路,將來小如想食咩都得,係咪有必要咁早開始接觸大人食物?一旦吃過人間美食就難以回頭(因味太濃),再者市面上的黑心食材太多,我可以為她做的就是小心選擇食材,盡能力避到就避。





可能有人會覺得我吔緊張,咁我認架!

小如喺我吔個心肝寶貝又點可以唔緊張呢?依家可以為囡囡做的就是以天然調味料煮出愛心飯菜。希望堅持到她兩歲。






























不得不讚,小如係抵錫,如果我跟她說這是大人的食物,她就會乖乖不吃,好多時婆婆會拿食物誘惑她,囡囡會擰頭 say no 叫婆婆食、媽媽食!






























進食方面都算叻,不用媽媽操心可以自己用匙食哂成碗飯(有時仲會唔夠喉要添飯),自己飲奶奶(早排已經轉用杯飲奶)、食水果、零食餅餅、波波米等,仲有媽咪愛心自家製的包包和糕糕。





































語(魚)錄實況:
🐟媽:今日茶點食咩好呢? 
小🐟:食包包呀!

🐟媽:但媽媽無整包包喎!
小🐟:糕糕呢!

🐟媽:媽媽都無整蛋糕o姐!
小🐟:吓......(加埋失落表情,笑到我肚痛XD)

小如真係好賞面,鐘意食媽媽整嘅嘢,令媽媽好開心,滿足不已!






















































學術發展方面,小如將近1歲時帶她上 playgroup (學前遊戲班),每星期上一課(頂多兩課),上了近三個多月因我生病而暫停,只好等身體無大礙才帶她上課。

有些人認為太早帶孩子上學不是好事,於我而言,如家中只得一個小孩不防讓他們早點參與遊戲班,從遊戲中學習(其實最大得著係父母 + 有意想不到的驚喜),訓練大小肌肉,學習群體生活。






























學才藝?入名牌幼稚園?No Way...... 只想囡囡多些參與群體生活,懶媽媽又唔駛諗去邊度放電:P。

於我而言,成績不是一切,個人品德才最重要。


還記得當初擺烏龍為囡囡報錯班,眼見個個小朋友們都識行識走,才發現報大左...問姑娘需要為阿囡調班?怕影響其自信心。





觀察兩堂後,姑娘認為小如能跟上進度,只是在大肌肉上需要媽媽幫手,還讚她說話能力好好,並不是鸚鵡學舌,而是懂得當中意思,我都覺呀!

阿囡好聰明,明白我吔講啲咩,有問有答,所以唔好成日低估小朋友的能力,以為細個就咩都唔識、唔知,家下啲小朋友實在太叻了,只不過是未能以言語表達自己的情感和需要。










講到自理能力媽媽感窩心,小如是媽媽的好幫手,幫忙收捨玩具、抹地、掉片片、刷牙、幫自己沖涼......遲些要跟媽mi入廚煮飯飯喔! 
























































最近囡囡已經識表達想去 poopoo,依照自己的時間表等她歲半後教用 baby potty 上廁所,唔知趕唔趕得切在冬季前戒片呢?


號外、號外⋯⋯

這篇Blog還未出街前(查實呢篇Blog都打左好耐XD),小如成功在 potty VV(尿尿),多數係撞彩,但看在媽媽眼內多感動,阿囡,做得好好呀!加油呀!






























短短18個月裡,小如真係大個左好多,她很聰明學識講好多嘢,記性好到有時都估佢唔到 XD。






















開始有自己的脾性,有時不順她意時會扭計鬧情緒,有時叫她安靜就刻意大聲叫,有時叫佢唔好掉東西或掉食物落地,就立即做一次比你睇......唔通咁快就 「Trouble Two」?































為滿足她的好奇心,在安全情況下,我們會放手讓她去嘗試及探索,避免不停說「不」、「No」等字眼。

讓她從日常生活中學會不同的技巧建立自理能力和責任心。































深明湊囡不能假手於人,感謝魚爸辛勞地工作,讓我可專心在家帶孩子。能夠陪著小如成長也是我的福氣。































我的寶貝甜心大得這麼快,媽mi好不捨得呀! 































做媽媽的能夠見證著寶寶健康成長感欣慰,郤又不捨得孩子大得那麼快的矛盾心情,現已深深體會。
























小高重視培育女兒品格、自理能力和閱讀興趣,常常提醒自己勿忘初衷 —— 只求女兒健康快樂,待人接物有禮,做個心地善良的人便足夠!

身教勝於言教,時刻提醒自己要身體力行,樹立良好的榜樣,比起說教更具感染力。


倩如,爸bi媽mi愛你,永遠愛著你!




















5 則留言:

  1. 小魚好叻女, 仲識幫媽媽做家務, 有小高媽媽教煮飯,小如大個dd可以做埋小廚神.

    回覆刪除
    回覆
    1. Ishiha,好多謝你的讚賞 kissssssssssss
      希望第時小如都有興趣跟媽咪煮嘢食啦 ~

      刪除
  2. 小如好可愛呀~~你地一家好sweet呀!

    回覆刪除
    回覆
    1. 艾華斯,多謝你呀!更要多謝仲有留意我出BLOG >3

      刪除
    2. 我仲中意睇blog架~~不過做咗媽媽一定好忙,你要加油呀^^

      刪除

Related Posts Plugin for WordPress, Blogger...